Vala ekstreme e të nxehtit që përfshiu Holandën nga 22 qershori deri më 5 korrik ka shkaktuar më shumë se 900 vdekje.
Autoritetet shëndetësore bëjnë të ditur se shkaku i saktë i vdekjeve nuk është konfirmuar, por vlerësohet se është "shumë e mundshme" që temperaturat e larta të kenë luajtur një rol të rëndësishëm.
Sipas Institutit Kombëtar për Shëndetin Publik dhe Mjedisin, të moshuarit janë më të rrezikuarit gjatë periudhave me temperatura ekstreme, pasi organizmi i tyre funksionon më pak në mënyrë efikase, djersit më pak dhe ka më shumë gjasa të dehidratohet. Gjithashtu, personat që vuajnë nga sëmundje kronike të zemrës, enëve të gjakut dhe mushkërive përballen me një rrezik më të lartë, pasi nxehtësia mund të përkeqësojë gjendjen e tyre shëndetësore.
Instituti theksoi se edhe cilësia e dobët e ajrit gjatë valës së të nxehtit ka shtuar rreziqet për shëndetin, veçanërisht për grupet më vulnerabël të popullsisë.
Vdekshmëria e tepërt u regjistrua në të gjitha rajonet e Holandës, ndërsa numri më i lartë i viktimave u raportua në jug dhe lindje të vendit, ku temperaturat arritën nivelet më të larta. Edhe pse numri i vdekjeve u rrit në të gjitha grupmoshat, rritja më e ndjeshme u shënua tek personat e moshës 80 vjeç e lart.
Sondazh
Lexo gjithashtu
