Armela Krasniqi, drejtuesja e Autoritetit të Mediave Audiovizive, u është drejtuar me një thirrje për kujdes të gjitha mediave dhe llogarive që publikojnë përmbajtje në rrjetet sociale, në lidhje me dhunimin e një adoleshente në Fier.
"Thirrje për kujdes për çdo përmbajtje dhune, që lidhen me ngjarjen e rëndë, të publikuar në rrjetet sociale. Vetëm sot, në përgjigje të ankesave të publikut, për përmbajtjet e dhunës të publikuara në platformën TikTok, me të cilën kemi bashkëpunim, kemi raportuar dhe bllokuar 3 video të denoncuara. Të tjera janë ende në proces shqyrtimi nga platforma.
Duke pasur parasysh se shpesh, materiale të tilla nga rrjetet sociale e platformat online, përfundojnë edhe në ekranet televizive, qoftë edhe duke mbajtur qëndrime mospajtuese me aktet e dhunës dhe bullizimin, ju bëj thirrje redaksive që të tregohen profesioniste dhe me etikë në pasqyrimin e kësaj ngjarjeje të rëndë dhe shqetësuese për opinionin publik", thotë Krasniqi.
Drejtuesa e AMA-s thekson se pritshmëria është që ky rast të mos përdoret për sensasion a qëllim “klikimi”, por të tregohet kujdes për të mbrojtur viktimën e dhunës nga identifikimi, me kërkesën që aktorët përgjegjës të udhëhiqen nga parimi i interesit më të lartë të fëmijës dhe nga detyrimi ligjor për garantimin e privatësisë dhe mbrojtjen e identitetit të të miturve të përfshirë në ngjarje.
"AMA po vijon monitorimin e përmbajtjeve të transmetuara nga OSHMA-të, për të identifikuar shkeljen e kërkesave të ligjit 97/2013, si dhe Kodit të Transmetimit. Çdo shkelje do të trajtohet sipas legjislacionit në fuqi", përmbyll Armela Krasniqi.
Sondazh
Lexo gjithashtu
