Një gjykatë apeli në Francë ka lënë në fuqi dënimin e Marine Le Pen për përvetësim të fondeve të Parlamentit Evropian, por ia ka shkurtuar ndalimin për të kandiduar për poste të zgjedhura, duke i hapur potencialisht rrugën udhëheqëses së ekstremit të djathtë për të kandiduar në garën presidenciale të vitit 2027.
Megjithatë, gjykata i dha gjithashtu Le Pen një dënim me tre vjet burg, me dy vjet me kusht dhe një vit gjatë të cilit duhet të qëndrojë në mbikëqyrje elektronike. Kjo mund ta bëjë një fushatë presidenciale të vështirë politikisht dhe logjistikisht.
Le Pen, e cila kryeson partinë anti-imigracion Tubimi Kombëtar (RN), më parë ka sugjeruar se nuk do të kandidojë nëse do t’i jepej një dënim i ndryshuar me burgim, në të cilin lëvizjet e saj do të kufizoheshin ose do t’i duhej të mbante mbikëqyrje elektronike.
«Nëse më lejohet të jem kandidat, por në fakt më pengohet të bëj fushatë lirisht, atëherë e kuptoni që kjo nuk do të ishte e mundur», tha Le Pen në një intervistë javën e kaluar.
Pozicioni i saj nuk ishte menjëherë i qartë pas vendimit. Një gjyqtar tjetër do të shqyrtojë në një datë të mëvonshme funksionimin e saktë të çdo pajisje elektronike ose monitorimi për Le Pen.
Figura kryesore e ekstremit të djathtë, e cila u paraqit në gjykatë me aleatë nga grupi parlamentar i partisë së saj, pritet të shqyrtojë qëndrimin e saj dhe të bëjë një njoftim më vonë të martën, nëse do të kandidojë për postin më të lartë të Francës pranverën e ardhshme.
Gjykata e Parisit vendosi që Le Pen, 57 vjeçe, kishte luajtur një rol qendror në orkestrimin e një mashtrimi me vende pune të rreme me përmasa dhe kohëzgjatje të paparë për të përvetësuar fondet e Parlamentit Europian dhe për t'i kanalizuar paratë për të paguar partinë e saj në Paris midis viteve 2004 dhe 2016.
Udhëheqësja e ekstremit të djathtë, u gjobit gjithashtu me 100,000 euro.
Marine Le Pen ishte konsideruar si një nga pretendentet kryesore për presidencën e vitit 2027 deri në marsin e kaluar, kur, pas një gjyqi të parë, asaj iu ndalua të kandidonte për pesë vjet me efekt të menjëhershëm, pasi u shpall fajtore për mashtrimin e gjerë dhe afatgjatë të vendeve të punës të rreme në Parlamentin Europian.
Ajo apeloi kundër vendimit të vitit të kaluar dhe një gjyq i ri në gjykatën e apelit të Parisit u mbajt këtë vit, ndërsa ajo luftoi për të ardhmen e saj politike. Ajo i tha gjykatës se nuk kishte asnjë “sistem” të krijuar nga partia e saj për të keqpërdorur fondet e Parlamentit Europian dhe se “nuk kemi ndjesinë se kemi kryer as krimin më të vogël”.
Por prokurorët e shtetit, duke përmbledhur çështjen, thanë se Le Pen kishte qenë në qendër të një sistemi “të menduar mirë”, “të centralizuar” dhe pothuajse “industrial” për të përvetësuar fondet e Parlamentit Europian.
Le Pen shpresonte të kandidonte për presidente për herë të katërt pranverën e ardhshme, kur të mbarojnë dy mandatet e Emmanuel Macron në detyrë. Ajo është mundur dy herë nga Macron në balotazhin e fundit, në vitin 2017 dhe në vitin 2022, kur e rriti rezultatin e saj në më shumë se 41%.
Sondazh
Lexo gjithashtu
