Ann Widdecombe, ish-deputete dhe ish-ministre në qeverinë konservatore britanike, ka ndërruar jetë në moshën 78-vjeçare. Ajo u gjet e pajetë në banesën e saj, ndërsa autoritetet britanike dyshojnë se bëhet fjalë për një vrasje.
Policia britanike ka nisur një hetim për vrasje. Trupi i Widdecombe u gjet me "lëndime të rënda" nga shërbimi i ambulancës në një adresë në Haytor, Devon, rreth orës 11:40 të paradites së të enjtes. Policia bëri të ditur se oficerët po kërkojnë një "mashkull të bardhë" në lidhje me vdekjen e saj.
Të afërmit e ish-ministres konservatore janë njoftuar dhe po marrin mbështetje nga oficerë të trajnuar posaçërisht, bëri të ditur Policia e Devonit dhe Cornwall-it.
Detektivët e Ekipit të Hetimit të Krimeve Madhore kanë nisur hetimet për vrasje dhe po zhvillojnë verifikime të gjera për të zbardhur rrethanat e vdekjes së Widdecombe.
Rrugët përreth vendit të ngjarjes janë mbyllur dhe prona është rrethuar me shirit sigurie, ndërsa ekspertët mjeko-ligjorë vijojnë ekzaminimet.
Policia njoftoi se gjatë së premtes do të ketë një prani të shtuar të forcave të rendit në zonë, ndërsa detektivët do të kryejnë kontrolle derë më derë dhe do të analizojnë pamjet e kamerave të sigurisë.
Oficerja e policisë, Ilona Rosson, tha se ngjarja është në fazat e para të hetimit.
"Ky është një incident jashtëzakonisht tragjik dhe mendimet tona janë me familjen dhe miqtë e Ann Widdecombe në këtë periudhë të vështirë.
Hetimi ynë për vrasjen është ende në fazat e hershme, por po përparon me ritme të shpejta. Po përdorim të gjitha burimet e nevojshme për të zbuluar saktësisht se çfarë ka ndodhur dhe për të identifikuar personin përgjegjës, për të cilin besojmë se është një mashkull i bardhë. U bëj thirrje të gjithë atyre që mund të kenë informacion, sado i vogël të duket, të kontaktojnë policinë.", tha ajo.
Rosson shtoi se prania e shtuar e policisë synon gjithashtu t'u ofrojë siguri banorëve të zonës dhe se kushdo që ka shqetësime mund t'u drejtohet oficerëve në terren.
Widdecombe, e cila u shfaq në emisionet e Talk Radio të mërkurën, jetonte në Haytor Vale, një fshat brenda Parkut Kombëtar Dartmoor.
Ajo ishte deputete e Partisë Konservatore nga viti 1987 deri në vitin 2010, duke përfaqësuar fillimisht zonën zgjedhore Maidstone dhe më pas Maidstone and Weald, në Kent. Në vitin 2019 iu bashkua Partisë Brexit dhe shërbeu si eurodeputete për Anglinë Jugperëndimore deri në vitin 2020. Më pas ishte anëtare edhe e Reform UK.
Në reagimin e publikuar pas njoftimit për vdekjen e saj, menaxhmenti i Widdecombe i bëri homazhe ish-ministres, pa dhënë detaje mbi rrethanat e vdekjes.
Sondazh
Lexo gjithashtu
