Kryeqyteti i Turqisë është kthyer sot në qendrën e diplomacisë dhe sigurisë ndërkombëtare, ndërsa ka nisur zyrtarisht Samiti i NATO-s 2026, një nga ngjarjet më të rëndësishme politike dhe ushtarake të vitit. Sytë e gjithë botës janë përqendruar në Ankara, ku janë mbledhur liderët e 32 vendeve anëtare të Aleancës, së bashku me partnerë strategjikë, ministra dhe delegacione të nivelit të lartë.
Në mesin e personaliteteve më të rëndësishme që marrin pjesë në samit është edhe presidenti i Shteteve të Bashkuara të Amerikës, Donald Trump, ndërsa Shqipëria përfaqësohet nga kryeministri Edi Rama, i cili i bashkohet diskutimeve mbi sfidat më të mëdha të sigurisë euroatlantike.
Turqia, në rolin e vendit mikpritës, pret jo vetëm krerët e shteteve dhe qeverive të NATO-s, por edhe dhjetëra ministra, diplomatë dhe përfaqësues të lartë ushtarakë, duke e shndërruar Ankaranë në epiqendrën e vendimmarrjes globale për dy ditët e ardhshme.
Samiti pritet të dominohet nga çështje kyçe si rritja e shpenzimeve për mbrojtjen, mbështetja afatgjatë për Ukrainën dhe forcimi i industrisë së mbrojtjes së Aleancës.
Sekretari i Përgjithshëm i NATO-s, Mark Rutte, ka theksuar se vendet evropiane synojnë të dëshmojnë se po përmbushin angazhimet për investime më të mëdha në mbrojtje, ndërsa gjatë samitit priten të shpallen edhe marrëveshje të rëndësishme për furnizimin me armë dhe pajisje ushtarake.
Në hapjen e Forumit të Industrisë së Mbrojtjes, aktiviteti i parë zyrtar i samitit, Mark Rutte prezantoi tre iniciativa të reja që synojnë të rrisin kapacitetet operacionale të NATO-s dhe bashkëpunimin industrial mes vendeve aleate.
Nisma e parë lidhet me modernizimin e flotës shumëkombëshe të transportit ajror, duke përfshirë avionët Airbus A400M dhe flotën e tankerëve Airbus A330 MRTT. Sipas Rutte, disa vende aleate do të njoftojnë zyrtarisht furnizimin me avionë të rinj A330 MRTT, duke forcuar ndjeshëm aftësitë strategjike të Aleancës për transport dhe furnizim në ajër.
???? LIVE: The Transatlantic Defense Industry Cooperation program is held as part of the 36th NATO Summit https://t.co/CTpN3KthB9
— Anadolu English (@anadoluagency) July 7, 2026
Nisma e dytë parashikon një projekt të përbashkët për blerjen e avionëve pa pilot MQ-4C Triton, të cilët do të rrisin kapacitetet e NATO-s në inteligjencë, mbikëqyrje dhe zbulim, veçanërisht mbi zona të gjera detare.
Ndërkohë, projekti i tretë përfshin zëvendësimin e flotës ekzistuese AËACS. Aleatët kanë rënë dakord të sigurojnë deri në 10 avionë modernë Saab GlobalEye, të prodhuar në Suedi, të cilët do të zëvendësojnë avionët Boeing E-3A Sentry që kanë shërbyer për dekada në strukturat e NATO-s.
Paralelisht me punimet e samitit, presidenti turk Recep Tayyip Erdogan zhvilloi një takim me dyer të mbyllura me kryeministrin kanadez Mark Carney, në kuadër të takimeve dypalëshe që po zhvillohen në margjinat e samitit.
Gjatë dy ditëve të punimeve pritet të zhvillohen edhe dhjetëra takime mes liderëve botërorë, ku në fokus do të jenë jo vetëm siguria euroatlantike, por edhe zhvillimet gjeopolitike, bashkëpunimi ushtarak dhe sfidat e reja globale.
Samiti i NATO-s në Ankara do të vijojë edhe gjatë së mërkurës, ndërsa vendimet që pritet të merren konsiderohen me rëndësi të veçantë për të ardhmen e Aleancës dhe arkitekturën e sigurisë ndërkombëtare.
Sondazh
Lexo gjithashtu
