Autoritetet saudite kanë marrë miratimin e administratës amerikane përpara se të ndërmerrnin sulmin e djeshëm ndaj aeroportit në kryeqytetin e Jemenit, Sanaa, i cili kontrollohet nga Huthitët e lëvizjes rebele Ansar Allah.
Sipas burimeve nga zyrtarë amerikanë, Princi i Kurorës dhe Kryeministri i Arabisë Saudite, Mohammed bin Salman, e kishte njoftuar Presidentin e SHBA-së, Donald Trump, për planet e sulmit, duke kërkuar mbështetjen e Uashingtonit.
Trump ka shprehur mbështetje për veprimet e planifikuara nga Riadi. Vendimi i autoriteteve saudite për të koordinuar operacionin me SHBA-në paraprakisht sinjalizon se sauditët janë "të shqetësuar për një konflikt më të madh me Huthët që do të kërkojë mbështetje ushtarake dhe diplomatike nga SHBA-të".
Më herët, Ministria e Mbrojtjes e Jemenit deklaroi se sulmi kishte në shënjestër pistën e aeroportit të Sanaas, me synimin për të penguar uljen e një avioni iranian.
Sipas ministrisë, Huthitët e lëvizjes Ansar Allah kishin ndaluar kompaninë ajrore kombëtare të Jemenit të përdorte aeroportin e kryeqytetit, ndërsa kishin lejuar uljen e një avioni iranian në territorin jemenas.
Nga ana tjetër, Rebelët akuzuan Arabinë Saudite për sulmet ndaj aeroportit të Sanaas. Ministria e Jashtme e administratës së Huthitëve e cilësoi sulmin si një "deklaratë lufte" dhe njoftoi përfundimin e periudhës së deeskalimit.
Sondazh
Lexo gjithashtu
