Drejtuesi i në mjeti lundrues në gjirin e Llamanit, shtetasi me iniciale E. M., 35 vjeç, banues në Orikum ka humbur ekuilibrin duke përfunduar në det, ndërsa thuhet se ka dëmtuar këmbën. Falë ndërhyrje së menjëhershme të policisë është shmangur ngjarja e rëndë që mund të përfundonte në tragjedi.
I riu mësohet se është transportuar në spital për ndihmë mjekësore, ku fatmirësisht thuhet se ndodhet jashtë rrezikut për jetën.
Ndërsa gomonia me të cilën ai lëvizte, e cila paraqiste rrezik për mjetet e tjera lundruese dhe për pushuesit, u vu nën kontroll nga Njësia Policore Detare dhe Policia Kufitare.
Tragjedia u parandalua pasi një punonjës i Njësisë Policore Detare mundi të hidhej në bordin e gomones dhe ta ndalonte atë pa prekur apo plagosur më shumë të riun.
Kujtojmë se ngjarja e sotme ka ndodhur vetëm pesë ditë nga tragjedia e ndodhur në Ksamil ku Albiano Kreçi, vetëm 22-vjeç, humbi jetën pas një aksidenti.
Ai ishte duke lundruar me një mjet tip “jet car”, ne momentin kur dyshohet se u përplas me një skaf të Policisë Kufitare të Sarandës e cila ndodhej në shërbim dhe monitorim të hapësirës detare, rreth 400 metra larg bregut.
Fatkeqësisht kjo përplasje rezultoi të ishte fatale për të riun. Ishin efektivët e policisë dhe personat e tjerë që ndodheshin në afërsi të vendit të ngjarjes ata të cilët ndërhynë për të nxjerrë 22-vjeçarin nga deti.
Menjëherë ai u transportua me urgjencë në spitalin e Sarandës, por fatkeqësisht nuk arriti t’u mbijetojë plagëve të marra nga përplasja.
Njoftimi i Policisë:
Himarë / Policia Kufitare shmang një tragjedi të mundshme në det
Ndërhyrja e menjëhershme e shërbimeve të Policisë Kufitare në Himarë shmangu sot një ngjarje me pasoja të rënda në det.
Pas njoftimit se një gomone po lëvizte në mënyrë të pakontrolluar dhe me shpejtësi, pa persona në bord, shërbimet e Policisë Kufitare ndërhynë menjëherë në zonën e "Kepit të Rigonit", përballë plazhit të Llamanit.
Nga verifikimet rezultoi se drejtuesi i mjetit lundrues, shtetasi E. M., 35 vjeç, banues në Orikum, kishte rënë në det gjatë lëvizjes dhe kishte dalë në gjirin e Llamanit, i dëmtuar në këmbë. Ai u transportua në spital për ndihmë mjekësore dhe ndodhet jashtë rrezikut për jetën.
Gomonia, e cila paraqiste rrezik për mjetet e tjera lundruese dhe për pushuesit, u vu nën kontroll nga Njësia Policore Detare dhe Policia Kufitare. Një punonjës i Njësisë Policore Detare mundi të hidhej në bordin e gomones dhe ta ndalonte atë.
Më pas, mjeti lundrues u tërhoq në PKK Himarë për verifikime të mëtejshme.
Policia Kufitare vijon të jetë e angazhuar maksimalisht në shërbim të qytetarëve, vizitorëve dhe turistëve. Në këtë kuadër, ajo fton qytetarët që, në rast nevoje, të telefonojnë në numrin 112.
