Kryeministri Albin Kurti ka mbërritur mesditën e sotme në kanalin e Ibër Lepencit në veri të Kosovës, aty ku kriminelët e orkestruar nga Serbia shpërthyen me eksploziv kanalin që furnizon me ujë disa qytete dhe termocentralin Kosova B.
I veshur me xhinse dhe xhup sportiv, si dhe çizme llastiku të mbushura me baltë, Albin Kurti ka shkuar vetë në vendin ku është shpërthyer muri i kanalit që sjell ujë nga Liqeni i Ujmanit drejt Kosovës.
"Sot së bashku me ministrin Sveçla, Drejtorin e Policisë së Kosovës, Hoxha dhe Drejtorin e AKI-së, Ajeti dhe Kryeshefin Ekzekutiv të “Ibër-Lepencit”, Mujka ishim në fshatin Varagë të Zubin Potokut, tek kanali i dëmtuar nga shpërthimi i mbrëmshëm", shkruan kryeministri.
Albin Kurti thotë se institucionet tona të sigurisë janë duke bërë përpjekje maksimale për zbardhjen e rastit dhe deri tani ato kanë kryer bastisje, ku ka edhe të arrestuar, dëshmi e prova materiale. "Të gjithë këta kriminelë dhe terroristë do të përballen me drejtësinë", shkruan kryeministri i Kosovës.
Ai thotë se falë punës së jashtëzakonshme të institucioneve, inxhinierëve dhe punëtorëve të ndërmarrjeve publike, kanali i Ibër Lepencit është kthyer në funksion në kohë rekord duke mundësuar furnizimin e KEK-ut me ujë.
Strukturat kriminale serbe dhe terroristët me lidhje politike direkte në Beograd, kanë orkestruar mbrëmjen e djeshme një sulm që nuk ka asnjë dallim nga ajo që po bën Rusia në Ukrainë. Terroristët serbë kanë hedhur në erë me sasi të mëdha eksplozivi kanalin e Ibër Lepencit.
Dëmtimet në rrjet janë të mëdha, pasi nga kanali kryesor i Ibër Lepencit furnizohen me ujë disa qytete në Kosovë si dhe KEK-u, për ftohjen e termoelektranave dhe prodhimin e energjisë elektrike.
© Newsbomb.al
Sondazh
Lexo gjithashtu
