Momente tmerri kanë përjetuar mëngjesin e kësaj të premteje pasagjerët e një avioni që ishte nisur nga Selaniku me destinacion Mynihun, pasi një defekt i rëndë teknik në motor shkaktoi thyerjen e xhamit.
Sipas informacioneve paraprake, gjithçka nisi pak minuta pas ngritjes së avionit, kur motori kryesor pësoi një defekt serioz, duke bërë që disa pjesë të tij të shkëputeshin gjatë fluturimit. Fragmentet goditën trupin e avionit dhe thyen një nga dritaret e kabinës, çka solli dekompresim të menjëhershëm dhe krijoi skena paniku mes pasagjerëve që ndodheshin mijëra metra mbi tokë.
Më dramatike ishte situata e një pasagjeri 61-vjeçar nga Serbia, i cili ishte ulur pranë dritares që u shkatërrua nga goditja. Forca e dekompresimit e tërhoqi trupin e tij drejt hapësirës së krijuar, ndërsa për disa minuta ai mbeti pjesërisht jashtë avionit. Vetëm reagimi i menjëhershëm i bashkëshortes së tij, e cila e mbajti fort nga këmbët si dhe ndihma e disa pasagjerëve të tjerë, shmangën një tragjedi. Dëshmitarët rrëfejnë se koka e 61-vjeçarit kishte dalë jashtë avionit, ndërsa përpjekjet për ta tërhequr sërish brenda zgjatën disa minuta.
Piloti reagoi menjëherë sapo konstatoi situatën emergjente, duke aktivizuar protokollet e sigurisë dhe duke marrë vendimin për t'u kthyer në Aeroportin e Selanikut. Avioni u ul në mënyrë të sigurt dhe u dërgua në një zonë të posaçme të aeroportit, ndërsa ekipet e emergjencës dhe ambulancat ishin në gatishmëri për të asistuar të lënduarit.
Pasagjeri serb u transportua me urgjencë në spitalin AHEPA, ku mjekët konfirmuan se ai kishte pësuar djegie nga fërkimi, si pasojë e kontaktit të trupit me strukturën e avionit gjatë momentit dramatik, ndërsa ndodhej edhe në gjendje të rënduar psikologjike për shkak të shokut të përjetuar. Burime mjekësore bëjnë të ditur se ai ishte i vetëdijshëm dhe jashtë rrezikut për jetën, ndërsa iu nënshtrua një sërë ekzaminimesh.
Ndërkohë, dëshmitë e pasagjerëve përshkruajnë momente të një paniku të papërshkrueshëm. Një grua që ndodhej në avion tregoi se fillimisht u dëgjua një shpërthim i fortë, i ngjashëm me plasjen e një gome, ndërsa menjëherë më pas kabina u mbush me britma dhe ulërima, pasi avioni humbi lartësi për shkak të dekompresimit. Sipas saj, shumë pasagjerë menduan fillimisht se ishte hapur dera e emergjencës, ndërsa stjuardesat u përpoqën të menaxhonin situatën mes kaosit. Të gjithë vendosën maskat e oksigjenit, ndërsa askush nuk e kuptonte saktësisht se çfarë kishte ndodhur deri në momentin kur avioni nisi kthimin drejt Selanikut.
Autoritetet greke kanë nisur hetimet për të zbardhur shkaqet e plota të incidentit teknik, ndërsa avioni është vendosur nën kontroll të specializuar për të përcaktuar me saktësi rrethanat që çuan në një nga incidentet më të rënda ajrore të regjistruara në një fluturim civil në rajon.
Sondazh
Lexo gjithashtu
