Deputetja Marjana Koçeku e cila prej disa javësh ka vijuar aktivitetin e saj politik si deputete e pavarur, pas largimit nga grupi parlamentar i Partisë Socialiste, është takuar në Tiranë me eurodeputeten franceze Emma Fourreau, e cila ndodhet në Shqipëri në mbështetje të protestës qytetare që ka hyrë tashmë në ditën e 44.
Përmes një postimi në rrjetet sociale, Koçeku e cilësoi mbrojtjen e natyrës si një përgjegjësi që shkon përtej ndasive politike, duke theksuar se ruajtja e mjedisit është një detyrim ndaj qytetarëve dhe një tregues i standardeve që duhet të përmbushë një shtet që synon integrimin europian.
Ajo nënvizoi se zhvillimi dhe mbrojtja e natyrës nuk janë procese që përjashtojnë njëri-tjetrin, por duhet të ecin paralelisht në funksion të interesit publik.
“Me eurodeputeten franceze dhe aktivisten për mbrojtjen e mjedisit dhe çështjeve sociale, Emma Fourreau, e cila erdhi në Tiranë për me e mbështetë protestën.
Folëm për çështjen e mjedisit dhe për randësinë e angazhimit qytetar dhe politik në mbrojtje të natyrës. Mjedisi nuk njeh parti. Natyra nuk negocion me vendime të gabueme. Ajo ose mbrohet ose humbet.
Mbrojtja e natyrës nuk asht pengesë për zhvillimin. Asht prova ma e madhe e përgjegjësisë së nji shteti ndaj qytetarëve të vet dhe ndaj Europës që synon me iu bashku politikisht”, shkruan Koçeku.
Sondazh
Lexo gjithashtu
