Zonat qendrore dhe veriore të Spanjës janë përfshirë nga disa zjarre të mëdha pyjore, të cilat kanë djegur mijëra hektarë tokë dhe kanë detyruar qindra banorë të evakuohen.
Një nga zjarret më të mëdha, rreth 100 kilometra në veri të Madridit, është përhapur me shpejtësi, duke djegur mbi 13 mijë hektarë tokë. Si pasojë, disa qindra persona janë evakuuar, njoftuan autoritetet lokale këtë të diel.
Zjarri nisi të enjten në provincën e Guadalajarës dhe përfshin Parkun Natyror Sierra Norte, nuk ka shkaktuar viktima deri tani. Megjithatë, presidenti i rajonit, Emiliano Garcia-Page, e ka cilësuar situatën si "të vështirë".
Kryeministri spanjoll Pedro Sanchez bëri të ditur në platformën X se po "ndjek nga afër zhvillimin e zjarrit në Guadalajara" dhe shprehu "mirënjohjen e tij të plotë për të gjithë ata që punojnë pa u lodhur për të mbrojtur jetët e njerëzve dhe për të vënë nën kontroll flakët".
“Mohimi i emergjencës klimatike nuk e zhduk atë. Vetëm na bën më të prekshëm”, shtoi ai.
Sondazh
Lexo gjithashtu
