Arkëmorti me trupin e ish-kryeministrit të Shqipërisë, Fatos Nano, ka mbërritur mëngjesin e sotëm në Pallatin e Kongreseve në Tiranë, ku po zhvillohen homazhet publike dhe ceremonia shtetërore në nderim të tij.
Trupi i liderit historik të së majtës shqiptare është vendosur në hollin kryesor të Pallatit, ku janë krijuar kushtet për qytetarët që dëshirojnë t’i japin lamtumirën e fundit. Pas arkëmortit qëndrojnë bashkëshortja e tij, Xhoana Nano, familjarët më të afërt dhe të afërm të tij.
Homazhet publike kanë nisur në orën 08:30 dhe do të zgjasin deri në orën 11:00, kohë gjatë së cilës pritet pjesëmarrje e gjerë nga qytetarë të ardhur edhe nga rrethet, përfshirë mbështetës të Partisë Socialiste dhe figura të jetës publike.
Pas përfundimit të homazheve publike, në orën 11:15 do të zhvillohet ceremonia shtetërore e nderimit, ku do të marrin pjesë personalitete të larta të shtetit, trupi diplomatik dhe drejtues të institucioneve.
Në fund të ceremonisë, sipas axhendës zyrtare, do të mbajnë fjalime përshëndetëse Kryeministri Edi Rama, pasues i Nanos në drejtimin e Partisë Socialiste dhe bashkëshortja e ish-kryeministrit, Xhoana Nano.
Në orën 12:05 do të zhvillohet ceremonia funebre shtetërore e lamtumirës, ndërsa në të gjithë vendin do të mbahet një minutë heshtje në orën 12:00, në shenjë respekti për jetën dhe kontributin e tij në politikën shqiptare.
Në përfundim të ceremonisë shtetërore, Fatos Nano do të përcillet për në banesën e fundit në një ceremoni private familjare.
Këshilli i Ministrave ka shpallur 2 nëntorin ditë zie kombëtare, ndërsa flamujt në të gjitha institucionet publike janë ulur në gjysmë shtize. Radiotelevizioni Publik Shqiptar po transmeton muzikë funebre gjatë gjithë ceremonisë shtetërore.
-
Shqipëria i jep lamtumirën Fatos Nanos!
2 Nëntor, 07:41
Sondazh
Lexo gjithashtu
