Në ambientet e Kuvendit të Shqipërisë kanë nisur të mbahen homazhet në nder të ish-deputetit demokrat Gerti Bogdani i cili u nda nga jetë një ditë më parë për shkak të një ataku kardiak.
Mes lotëve dhe dhimbjes, deputetët demokratë kanë marrë pjesë këtë të enjte në homazhet në nderim të kolegut të tyre.
Flamur Noka, Gazment Bardhi, Agron Gjekmarkaj, Jorida Tabaku, Ina Zhupa, Luçiano Boçi, e shumë deputetë demokratë të tjerë, me kurorat me lule, kanë shkuar në hollin e Kuvendit ku dhe po zhvillohen homazhet dhe kanë shkruajtur në librin e kujtimeve fjalët e fundit për kolegun e tyre.
Ndërkohë ,mësohet se ish-kryeministri Sali Berisha nuk do të marrë pjesë në homazhet për Bogdanin pasi ndodhet në “arrest shtëpie” dhe nuk arriti të siguronte një lejë nga Gjykata për të marrë pjesë.
Bogdani humbi jetën pas një arresti kardiak teksa po zhvillonte një takim me miqtë në një prej hoteleve në bulevardin “Dëshmorët e Kombit”. Ikja e papritur e Gertit, e politikanit dhe djalit të mirë “tirons”, ka tronditur jo vetëm familjarët, por të gjithë kolegët e miqtë që patën fatin të punojnë me të.
Studenti shqiptar që shkëlqeu në SHBA, kush ishte Gerti Bogdani:
Gerti Bogdani ka lindur më 7 Korrik 1980 në Tiranë dhe shkollën e ka kryer në kryeqytet. Arsimin e mesëm ai e ka kryer në shkollën “Harry Fultz” ku është dalluar për rezultate të shkëlqyera dhe më pas vijoi studimet e larta në Universitetin Politeknik të Nju Jorkut.
Edhe në Amerikë, studenti i ri nga Tirana është diplomuar me "Nderimet më të Larta" (Summa Cum Laude), duke u shpallur edhe fitues i Outstanding Graduate Award - "Medalje Ari".
Menjëherë pas studimeve në SHBA, Gerti Bogdani vendosi të rikthehej në Shqipëri dhe të kontribuonte për vendin e tij. Falë përgatitjes së lartë që kishte, edhe përse i sapodiplomuar, Gerti pati oferta të shumta për t'u përfshirë në fushën akademike dhe nisi karrierën profesionale në Universitetin e New Yorkut –Tiranë.
Gjatë kësaj kohe, paralelisht i riu energjik nga Tirana themeloi dhe drejtoi Rrjetin e Studentëve Shqiptarë në Botë.
Karrierën politike e filloi në vitin 2007, kur kandidoi për Kryetar të Njësisë Bashkiake nr. 10 Tiranë, nën siglën e Partisë Demokratike. Garën e fitoi dhe u vazhdoi më tej aktivitetin si zëdhënës politik i Partisë Demokratike dhe Sekretar i Marrëdhënieve me Jashtë.
Dy vite pas këtij suksesi të parë në politikë, Gerti Bogdani vendosi të garonte në zgjedhjet parlamentare të vitit 2009.
Sukseset e tij ishin të pandalshme. Ishte energjia e një të riu që sapo ishte diplomuar në SHBA dhe rikthehej në vendin e tij për ta bërë atë padyshim më të mirë. Gerti Bogdani arriti të siguronte një vend në Kuvendin e Shqipërisë dhe u bë në atë kohë deputeti më i ri.
Në këtë kohë, Partia Demokratike organizon dhe zgjedhje për forumet e veta, duke bërë që Gerti të përfshihej në të dhe të zgjidhej Kryetar i Forumit Rinor të Partisë Demokratike, i cili më parë ishte drejtuar nga Sokol Olldashi. Pas përfundimit të mandatit të tij, drejtimin e mori Belind Këlliçi.
Gjatë kohës që ishte deputet i Partisë Demokratike, Gerti u zgjodh në vitin 2011 si zv/president i "Bashkimit Ndërkombëtar të të Rinjve Demokratë" (International Young Democrat Union - IYDU) e më pas, në janar të vitit 2012, nën/Kryetar. Katër vite pas aderimit në këtë formacion ndërkombëtar politik, në shtator 2015, ai zgjidhet Kryetar i IYDU, duke u bërë politikani i parë shqiptar që mbante një post kaq të lartë në një organizatë ndërkombëtare.
Krahas angazhimit politik dhe akademik, Gerti Bogdani vazhdoi të kontribuonte në Partinë Demokratike. Në zgjedhjet e vitit 2019 për strukturat e Partisë Demokratike, 44 vjeçari arriti të siguronte një tjetër sukses të lartë personal, duke u bërë anëtari më i votuar në Kryesinë e Partisë Demokratike, pasi mori mbi 70% të votave.
Gerti shprehu dhe ambicien për të qenë kandidat i Partisë Demokratike për postin e kryebashkiakut të Tiranës dhe në vitin 2022, u përfshi në procesin e primareve mes disa kandidatëve nga radhët e forcës politike ku aderonte, por demokratët ia dhanë shumicën Belind Këlliçit.
Fatkeqësisht, studenti që shkëlqeu në botë dhe me aktivizimin e tij në politikën shqiptare, duke e ngritur lart emrin e vendit tonë në çdo organizatë ndërkombëtare ku mori pjesë, mbylli sytë përgjithmonë këtë të mërkurë duke lënë pas trishtim të madh, te familja, miqtë, kolegët dhe qytetarët e shumtë që kishte takuar në disa fushata zgjedhore.
Prehu në paqe Gert Bogdani!
Sondazh
Lexo gjithashtu
