Deputetja Marjana Koçeku, mbrëmjen e sotme, ka zbuluar arsyet që e çuan drejt largimit nga Partia Socialiste dhe kandidimit si e pavarur.
Gjatë një interviste për Euronews Albania, Koçeku deklaroi se gjatë kohës që ushtroi mandatin si deputete e PS-së ka qenë kritikuese dhe kërkuese. Po ashtu, ajo tha se pakënaqësitë i kishte shprehur disa herë edhe në mbledhjet e Grupit Parlamentar të Partisë Socialiste.
“Gjatë tetë muajve si deputete e PS-së, kam qenë kritikuese dhe shumë kërkuese për komunitetin tim dhe për kauzat që i kam konsideruar të rëndësishme, si mjedisi apo çështjet e komunitetit të Shkodrës, nga vij unë. Mendoj se i kam dhënë shenjat e këtyre pakënaqësive dhe nuk kanë pse të habiten. Kam folur për lumin Drin si një urgjencë kombëtare, kam folur për Universitetin e Shkodrës”, tha Koçeku për Euronews Albania.
Sa i përket ndërhyrjes në Theth, Koçeku u shpreh se nuk kishte folur në atë kohë, pasi ende nuk e kishte marrë mandatin e deputetes. Më tej, ligjvënësja tha se mënyra se si u zhvillua ndërhyrja në zonën turistike ishte e pabesë dhe arrogante.
“Ndërhyrja në Theth ka ndodhur disa muaj para se unë të merrja mandatin e deputetes dhe nuk e ushtroja ende atë detyrë. Unë nuk jam dakord me mënyrën se si është ndërhyrë në Theth. Pabesia dhe arroganca kanë qenë shumë të mëdha. Unë i njoh njerëzit e mi dhe fyerjet gjatë ndërhyrjes kanë qenë të rënda. Një gjë është thënë gjatë fushatës dhe një tjetër është bërë më pas. Kam qenë kundër mënyrës së ndërhyrjes, sepse në atë zonë nuk i është vënë kurrë tritol askujt. Nuk i është vënë kurrë tritol malësorit dhe thethjanit. Ky është një dëm shumë më i madh se dëmi ekonomik që i është shkaktuar asaj zone”, tha më tej Koçeku.
Sondazh
Lexo gjithashtu
