Detaje të tjera kanë dalë rreth kryengritjes së ndërprerë nga Wagner fundjavën e kaluar, ku po bëhet e qartë se disa zyrtarë rusë dhe agjenci të huaja të inteligjencës e dinin paraprakisht për të.
Mediet amerikane raportuan të martën se gjenerali dhe ish-komandanti i lartë rus në Ukrainë, Sergei Surovikin ishte paraprakisht në dijeni të planit të Prigozhin.
Zyrtarët amerikanë thanë se ata ende po përpiqeshin të mësonin nëse gjenerali dha ndonjë plan për të ndihmuar kryengritjen e Prigozhin fundjavën e kaluar. Nëse gjenerali Surovikin do të ishte i përfshirë, kjo do të ishte një shenjë e madhe e “përçarjeve” të brendshme që kanë karakterizuar udhëheqjen ushtarake të Rusisë që nga fillimi i luftës në Ukrainë.
Të mërkurën e kaluar, zyrtarë të Inteligjencës Amerikane u thanë zyrtarëve të lartë ushtarakë dhe të administratës se Jevgeny Prigozhin po përgatitej të ndërmerrte veprime ushtarake kundër zyrtarëve të lartë të mbrojtjes ruse, raportoi The New York Times. Agjencitë amerikane të spiunazhit kishin dijeni ditë më parë se Prigozhin po planifikonte diçka, sipas zyrtarëve të njohur me këtë çështje.
Zyrtarët thanë se agjencitë e inteligjencës heshtën për planet shefit të Wagner, duke besuar se nëse ata thonë diçka publikisht, presidenti rus mund t'i akuzojë për orkestrimin e një grushti shteti.
Sondazh
Lexo gjithashtu
