Numri i viktimave nga dy tërmetet e fuqishme që goditën Venezuelën është rritur në të paktën 920 persona, ndërsa mbi 3,360 të tjerë kanë mbetur plagosur. Autoritetet thonë se situata është dramatike dhe ekipet e shpëtimit po punojnë pa pushim për të gjetur të mbijetuarit nën rrënoja.
Ndihma ndërkombëtare ka mbërritur në vend, me 80 shpëtimtarë zviceranë dhe një ekip punonjësish ndihme nga Meksika që tashmë janë bashkuar operacioneve të kërkim-shpëtimit.
Familjarët e personave të zhdukur po përjetojnë momente të dhimbshme. Natacha Diaz, nënë e dy vajzave 22 dhe 23 vjeçare, që ende nuk janë gjetur, iu drejtua mediave se “ato janë gjithçka që kam”.
"Këtu ishte një qendër të vogël tregtare, atje punonin vajzat e mia", thotë Natacha Diaz, duke qëndruar pranë vendit të një ndërtese të shkatërruar
Ndërkohë, Marianella, e cila po kërkon vëllain e saj, shprehet se zemra i thotë se ai është gjallë.
Gjendja në spitalet e La Guairas është kritike. Dy spitalet kryesore janë plotësisht të mbingarkuara dhe mjekët raportojnë mungesë të furnizimeve mjekësore, duke e bërë trajtimin e të plagosurve edhe më të vështirë.
Tërmetet, me magnitudë 7.2 dhe 7.5, goditën me një minutë diferencë të mërkurën në mbrëmje. I dyti ishte më i forti që ka goditur Venezuelën që nga viti 1900, duke lënë pas shkatërrim të madh dhe një krizë humanitare që kërkon mobilizim të menjëhershëm.
Sondazh
Lexo gjithashtu
