Në zgjedhjet presidenciale të Shteteve të Bashkuara të Amerikës, kandidati republikan Donald Trump ka arritur një fitore të rëndësishme në Pensilvani, duke e çuar numrin e votave elektorale në 267.
Me vetëm tre vota larg pragut prej 270 votash elektorale që kërkohen për të siguruar presidencën, Trump është shumë pranë rikthimit në Shtëpinë e Bardhë për herë të dytë. Ndërkohë, kandidatja demokrate Kamala Harris ka mbledhur deri tani 216 vota elektorale dhe mbështetësit e saj shpresojnë në fitore në disa nga shtetet ende të pavendosura.
Rezultatet e deritanishme kanë ndarë fitoret në shumicën e shteteve kyçe. Trump ka fituar në shtete të rëndësishme si Florida, Georgia, Teksas, dhe tani së fundmi në Pensilvani, duke fituar mbështetjen e votuesve republikanë në këto zona. Ndërkohë, Harris ka siguruar votat elektorale në shtete të mëdha si Kalifornia, Nju Jorku, dhe Illinois, si dhe në disa shtete të tjera perëndimore si Oregon dhe Kolorado.
Pas fitores së tij në Pensilvani, Trump është larguar nga rezidenca e tij në Mar-a-Lago për t’u drejtuar në Palm Beach, ku pritet të mbajë një fjalim për mbështetësit e tij. Ai ka shprehur besimin se votat e fundit do t'i sigurojnë fitoren dhe ka falënderuar votuesit për mbështetjen e treguar. Nga ana tjetër, Kamala Harris po ndjek situatën nga Uashingtoni dhe ka bërë thirrje që të numërohet çdo votë, duke theksuar rëndësinë e çdo zëri në këto zgjedhje.
Me numërimin ende në vazhdim në disa shtete kyçe, përfshirë Arizona, Nevada dhe Wisconsin, situata mbetet e paqartë. Demokratët shpresojnë ende për një "mur blu" në këto zona, duke shpresuar se do të mposhtin epërsinë e Trump dhe do të arrijnë të përmbysin rezultatin. Fati i presidencës tani varet nga numërimi i votave të fundit dhe rezultati në këto shtete të mbetura.
Kjo garë për Shtëpinë e Bardhë ka mbetur një nga më të ngushtat në historinë e vonë të SHBA-së, duke nxjerrë në pah ndarjet politike në vend dhe angazhimin e madh të votuesve për të bërë të dëgjohet zëri i tyre.
Sondazh
Lexo gjithashtu
