Kryeprokurori Altin Dumani është përgjigjur sot për deklaratat publike të kryebashkiakut Erion Veliaj, i cili pasi doli nga ambientet e SPAK ku dëshmoi për më shumë se 7 orë i quajti hetuesit dhe prokurorët "kolegë". Madje, edhe ditë më vonë Veliaj vazhdoi t'i quante ata "kolegë".
Deputetët e Komisionit të Ligjeve e kanë pyetur në seancën e sotme Altin Dumanin pikërisht për këto deklarata, duke nxitur tek ai një përgjigje sa të qartë aq edhe të perë.
"Përsa i përket koleg ose jo koleg, ne kolegë kemi vetëm njëri-tjetrin, ne që punojmë në Prokurorinë e Posaçme dhe kolegët që janë në Byronë Kombëtare të Hetimit. Pra, kolegë kemi vetëm ata që ushtrojnë funksione në ato zyra (SPAK)", u shpreh kryeprokurori.
Kryetari i Bashkisë së Tiranës, Erion Veliaj, më 30 prill ka qëndruar në Prokurorinë e Posaçme kundër Krimit të organizuar dhe Korrupsionit (SPAK) për rreth tetë orë. Ai tha për gazetarët se shkoi në SPAK në cilësinë e bashkëpunëtorit dhe kishte një kohë që kishte kërkuar një takim. Këtu përdori për herë të parë dhe fjalën "koleg".
Veliaj është pyetur për rolin e tij në aferën e inceneratorit të Tiranës, një aferë e madhe korruptive që po hetohet nga SPAK.
Kryebashkiaku i Tiranës është paraqitur në ambientet e Prokurorisë së Posaçme në orën 09.00 të mëngjesit datë 30 Prill, duke pretenduar se po shkonte me dëshirën e tij. Mirëpo, siç u mësua më vonë, Erion Veliaj u la një orë në pritje sepse ishte thirrur të pyetej në orën 10.00.
Sondazh
Lexo gjithashtu
