Një aksident i rëndë rrugor është shënuar pasditen e sotme në zonën e Ish-Kënetës në Durrës ku dy makinat që qarkullonin me shpejtësi skëterrë janë përplasur kokë më kokë me njëra-tjetrën.
Konkretisht bëhet fjalë për një mjet tip Mini Cooper me të cilin udhëtonin dy vajza, i cili raportohet se është përplasur me një Benz C Class dhe ka përfunduar në kanal.
Për rrjedhojë, nga ngjarja kanë mbetur të plagosura dy vajzat që udhëtonin me Mini Cooper.
Sipas banorëve të zonës që kanë qenë të pranishëm në vendngjarje rezulton se Mini Cooper ishte me shpejtësi kur u përplas në kryqëzim me mjetin që vinte në të majtë të tij.
Të plagosurat thuhet se janë nisur për të marrë mjekimin e nevojshëm në spitalin e Durrësit, ndërsa në vendngjarje pritet të mbërrijnë autoritetet vendase që të zbardhin ngjarjen e plotë.
Sakaq, zona e Ish-Kënetës, referuar dhe aksidenteve të shumta të ndodhura, njihet si një zonë problematike, ku shoferët tejkalojnë shpejtësinë e lejuar.
Në të njëjtën zonë ka ndodhur aksidenti tragjik që u mori jetën dy engjëjve Eneas dhe Klesit.
Ngjarja e rëndë u regjistrua mesditën e 3 majit në lagjen nr. 15 të Durrësit. Tre fëmijë po luanin me top në trotuar, kur Radaçi, i cili po drejtonte automjetin në gjendje të dehur, i përplasi me shpejtësi skëterrë.
Si pasojë e goditjes fatale, Enea Muçaj, 12 vjeç, dhe Klesi Nikolli, ndërruan jetë në vend, ndërsa fëmija tjetër, 8 vjeç, arriti të mbijetojë por aktualisht ndodhet në Spitalin e Traumës duke marrë ndihmën e nevojshme mjekësore.
Sondazh
Lexo gjithashtu
