Gjigandi i teknologjisë, Apple ka kërkuar falje për reklamën e saj të re për iPad Pro ku shtyp kamerat, librat dhe instrumentet muzikore.
Reklama e shpërndarë nga shefi ekzekutiv i kompanisë, Tim Cook, paraqet gjithashtu edhe mjete kreative si aparat diskografik dhe metronom teksa shtypen.
Ajo kishte për qëllim të tregonte gamën e gjerë të mjeteve për të cilat mund të përdoret iPad-i më i hollë ndonjëherë, por reklama nuk u prit aspak mirë, pasi ajo u kritikua për mesazhin që përcjell. Sipas aktorit Hugh Grant reklama e iPad Pro shfaqte shkatërrimin e përvojës njerëzore.
“Kreativiteti është në ADN-në tonë dhe është jashtëzakonisht e rëndësishme për ne që të dizajnojmë produkte që fuqizojnë krijuesit në të gjithë botën. Qëllimi ynë është të festojmë gjithmonë një mori mënyrash se si përdoruesit shprehen dhe sjellin idetë e tyre në jetë përmes iPad. Ne dështuam me këtë video dhe na vjen keq”,- tha nënkryetari i Apple për marketing, Tor Myhren.
Ndërkohë, Adam Singer nga kompania teknologjike e reklamave AdQuick, e quajti videon “metaforën e përsosur” për epokën e sotme.
Ndërkohë kujtojmë se shitjet e iPad ranë me 17 % gjatë periudhës janar-mars.
