Orion Nallbati, avokati i deputetit demokrat Agron Shehaj, ka denoncuar këtë të premte veprimet që ai i konsideron antiligjore të Policisë së Tiranës. Sipas Nallbatit, blutë e kryeqytetit i kanë vendosur shiritin biznesit të Shehajt te Rruga e Elbasanit dhe nuk kanë dhënë asnjë sqarim.
Shefi i IT në këtë biznes është shoqëruar nga Policia, pasi ka kërkuar shpjegime për ndalimin e punëtorëve dhe ndërprerjen e punës. Sipas avokatit, ata do të bëjnë kallëzim për veprimet e policisë.
Më herët, në ditët e fundit të vitit të kaluar, deputeti Agron Shehaj e ka ngritur dhe vetë shqetësimin për sulmet mbi bizneset e tij nga Policia. Ai ka pretenduar se është sulmuar për shkak të bindjeve dhe partisë politike të cilën përfaqëson.