Një shtetas 23 vjeçar ka rënë në prangat e bluve të Tiranës, pasi ka tentuar të kryejë një grabitje me pistoletë. Autori është identifikuar si Klejdi Ymeri.
Ngjarja është regjistruar në zonën e Shkozës në kryeqytet brenda një zyre financiare, ku autori ka kërcënuar personat me një pistoletë lodër që t’u merrte paratë.
Menjëherë në vendngjarje kanë mbërritur forcat e policisë të cilat kanë bërë të mundur arrestimin e tij.
Njoftimi i policisë:
Tentoi të vidhte në një subjekt për transferta parash në Shkozë, duke i kërcënuar punonjësit me një send në dukje armë zjarri (por plastike), por falë reagimit të menjëhershëm të Policisë, autori u neutralizua dhe u vu në pranga.
Sekuestrohet sendi i përdorur gjatë tentativës, i dyshuar si armë zjarri (por plastike).
Menjëherë pas marrjes së njoftimit se një shtetas kishte hyrë në ambientet e një subjekti për transferta parash dhe, nën kërcënimin e një sendi që dyshohej se ishte armë zjarri, kishte tentuar të vidhte një shumë parash, shërbimet e Komisariatit të Policisë Nr. 1 organizuan punën dhe ndërhynë menjëherë për kapjen e autorit.
Si rezultat i veprimeve të shpejta operacionale, u bë i mundur neutralizimi, kapja dhe arrestimi në flagrancë i shtetasit K. Y., 23 vjeç.
Gjatë kontrollit të zonës përreth u sekuestrua, në cilësinë e provës materiale, sendi i përdorur prej tij gjatë ngjarjes.
Materialet procedurale i kaluan Prokurorisë, ndërsa vijojnë hetimet për dokumentimin e plotë të rrethanave të kësaj ngjarjeje.
