Zgjedhjet e përgjithshme në Hungari po shkojnë drejt mbylljes këtë të diel, duke kulmuar me një përballje të fortë mes kryeministrit aktual, Viktor Orban, dhe rivalit të tij të qendrës së djathtë, Peter Magyar. Procesi zgjedhor është shoqëruar me një pjesëmarrje të lartë historike, duke sinjalizuar interes të madh qytetar për një moment të rëndësishëm politik.
Sipas të dhënave zyrtare, pjesëmarrja e votuesve arriti në 74.23% deri në orën 18:00, një rritje e ndjeshme krahasuar me 62.92% në të njëjtën orë gjatë zgjedhjeve të vitit 2022. Mbi 17.5 milionë qytetarë brenda vendit dhe rreth 500 mijë të tjerë jashtë Hungarisë janë thirrur për të votuar për rinovimin e Parlamentit me 199 anëtarë.
Qendrat e votimit u hapën në orën 06:00 të mëngjesit dhe pritet të mbyllen në orën 19:00, ndërsa ritmi i lartë i pjesëmarrjes gjatë gjithë ditës është interpretuar si tregues i një gare të fortë dhe potencialisht historike.
Këto zgjedhje konsiderohen vendimtare, pasi mund t’i japin fund sundimit 16-vjeçar të Viktor Orban, i cili ka udhëhequr vendin që nga viti 2010 dhe ka promovuar modelin e tij të “demokracisë joliberale”. Qeverisja e tij ka tërhequr vëmendje ndërkombëtare, përfshirë qarqe konservatore në Perëndim, si ato pranë Donald Trump.
Pas votimit të tij në mëngjes, Orban e cilësoi pjesëmarrjen e lartë si një zhvillim pozitiv, duke theksuar se “sa më shumë të marrin pjesë, aq më mirë”. Ai shtoi se nuk nënvlerëson kundërshtarin dhe ritheksoi se mesazhin e tij ua ka dhënë tashmë votuesve. Në lidhje me politikën e jashtme, ai deklaroi se Hungaria synon marrëdhënie të mira me të gjitha fuqitë e mëdha, përfshirë edhe raportet me Vladimir Putin.
Megjithatë, vitet e fundit qeveria e tij është përballur me pakënaqësi në rritje për shkak të stagnimit ekonomik, rritjes së kostos së jetesës dhe akuzave për korrupsion.
Në anën tjetër, Peter Magyar, një ish-aleat i Orban, po kërkon të kapitalizojë këtë pakënaqësi. Ai votoi në Budapest dhe paralajmëroi për një garë të ngushtë, duke theksuar se edhe “një apo dy vota mund të bëjnë diferencën”. Magyar ngriti shqetësime për parregullsi të mundshme dhe kërkoi reagim të fortë nga autoritetet në rast shkeljesh, ndërsa u shpreh i bindur për një fitore të opozitës.
Ndërkohë, kryebashkiaku i Budapestit, Gergely Karacsony, ka parashikuar së fundmi një ndryshim të madh politik. Ai deklaroi se pjesëmarrja rekord zakonisht penalizon partitë që kanë qenë gjatë në pushtet dhe se opozita mund të sigurojë shumicën parlamentare. Megjithatë, sipas tij, mbetet e paqartë nëse kjo shumicë do të arrijë nivelin e dy të tretave, që do të mundësonte ndryshime të thella ligjore.
Sondazh
Lexo gjithashtu
