Presidenti i SHBA-së Donald Trump gjatë një bisede telefonike me Barak Ravid, gazetar dhe analist izraelit në Channel 12, tha se e kishte paralajmëruar Benjamin Netanyahun se Izraeli mund të gjendet i vetëm përballë Iranit nëse vazhdon të përshkallëzohet më tej konflikti.
Ai tha se Uashingtoni është informuar në momentin e fundit për sulmet e djeshme. Trump gjithashtu tha se i kërkoi Netanyahut gjatë bisedës së tyre telefonike të dielën në mbrëmje që Izraeli të mos i përgjigjej sulmeve me raketa balistike të Iranit.
Sipas mediave Netanyahu zhvilloi bisedime me zyrtarë të lartë të sigurisë, pas të cilave ai informoi Sekretarin e Shtetit të SHBA-së, Marco Rubio, se kishte vendosur të kryente sulme ndaj Iranit, sipas Channel 12.
Lidhur me sulmet fillestare të Izraelit ndaj Iranit ditën e djeshme, Trump tha se Izraeli e informoi Uashingtonin për sulmet shumë vonë, pasi raketat ishin tashmë në rrugën e tyre drejt Iranit. Ai shtoi se ishte në gjendje të kufizonte fushëveprimin e sulmit.
Donald Trump tha gjithashtu se pesë vende në rajon të përfshira në përpjekjet e ndërmjetësimit midis Shteteve të Bashkuara dhe Iranit i kanë kërkuar atij të ushtrojë presion mbi Netanyahun për të ndaluar sulmet dhe për të ecur përpara me një marrëveshje.
Presidenti përsëriti në Channel 12 se ai beson se një marrëveshje me Iranin mbetet e mundur dhe e dobishme, dhe se Teherani dëshiron të nënshkruajë një marrëveshje të tillë. Ai madje këmbënguli se një marrëveshje është "disa ditë larg", diçka që ai e ka pohuar vazhdimisht për javë të tëra.
Sondazh
Lexo gjithashtu
