Presidenti francez Emmanuel Macron ka reaguar pas rezultatit të zgjedhjeve në Hungari, ku opozita e udhëhequr nga Peter Magyar ka arritur një fitore historike ndaj Viktor Orban.
Në një postim në “X”, Macron tha se ka zhvilluar një takim me liderin e ri hungarez, duke e përgëzuar për suksesin e partisë së tij Tisza.
“Sapo zhvillova një takim me Peter Magyar për ta përgëzuar për fitoren e tij në Hungari! Franca përshëndet një fitore të pjesëmarrjes demokratike, të lidhjes së popullit hungarez me vlerat e Bashkimit Europian dhe për Hungarinë në Evropë. Së bashku, le të çojmë përpara një Evropë më sovrane, për sigurinë e kontinentit tonë, konkurrueshmërinë tonë dhe demokracinë tonë,” shkroi Macron.
Pas një periudhe të gjatë tensionesh mes Budapestit dhe Brukselit duket se Parisi mbështet Hungarinë për orientimin drejtë Evropës.
Sipas rezultateve partia Tisza e Peter Magyar ka fituar 136 vende në parlamentin hungarez, duke siguruar shumicën prej dy të tretash nga gjithsej 199 vende. Ndërkohë, partia Fidesz e Viktor Orban ka mbledhur vetëm 56 vende, ndërsa Mi Hazank ka fituar 7 vende.
Ky është ndryshimi politik më i madh në Hungari, duke i dhënë fund epokës së gjatë të Orban dhe duke hapur një kapitull të ri në marrëdhëniet e vendit me Bashkimin Evropian.
Edhe Kancelari gjerman Friedrich Merz ka uruar liderin e opozitës hungareze Péter Magyar, për fitoren në zgjedhjet parlamentare, që sollën rrëzimin nga pushteti 16-vjeçar të Viktor Orban.
“Hungaria ka vendosur. Urime për fitoren në zgjedhje, i dashur Péter Magyar. Mezi pres bashkëpunimin për një Evropë të fortë, të sigurt dhe mbi të gjitha të bashkuar”,- shkruan Merz.
Sondazh
Lexo gjithashtu
