Një operacion i madh policor është zhvilluar këtë të mërkurë në ishullin luksoz të Mykonosit në Greqi, ku është shkatërruar një organizatë kriminale që kishte zhvilluar aktivitet të gjerë në trafikun e drogës në ishull. Deri më tani janë bërë pesë arrestime.
Sipas mediave greke, rasti është rezultat i një hetimi afatgjatë dhe të synuar nga policia, e cila po monitoronte aktivitetet e rrjetit. Deri më tani janë arrestuar pesë persona, përfshirë trurin dhe drejtuesin e organizatës, një shtetas shqiptar i cili më parë ka qenë në shënjestër të policisë për trafik droge, si dhe tre shtetas grekë që dyshohet se kanë luajtur rolin e shoferëve dhe bashkëpunëtorëve të tij.
Organizata kriminale përdorte një kompani transporti me furgonë turistikë si “dritare” për trafikun e drogës. Automjetet dyshohet se përdoreshin si për transportin e anëtarëve, ashtu edhe për shpërndarjen e drogës, kryesisht në qytetin e Mykonosit dhe në zona me fluks të lartë turistik.
Gjatë operacionit, policia greke gjeti një shtëpi të përdorur si “strehë” për ruajtjen e drogës në banesën e udhëheqësit shqiptar dhe sekuestroi sasi kokaine, “kokaine rozë” (tusi), ketamine, metamfetamine, tableta ekstazie dhe kanabis të papërpunuar.
Informacionet tregojnë se kokaina trafikohej në ishull me çmime që arrinin nga 150 deri në 200 euro për gram, me klientë kryesorë turistë dhe frekuentues të jetës së natës gjatë sezonit të verës.
Autoritetet greke nuk përjashtojnë mundësinë e arrestimeve të reja dhe gjetjeve shtesë, pasi kontrollet në banesa, automjete dhe vende të tjera janë ende në vazhdim.
Sondazh
Lexo gjithashtu
