Një gjyqtare federale në Boston ka bllokuar urdhrin ekzekutiv të Presidentit Donald Trump, i cili ndryshonte rregullat e votimit me postë, duke penguar hyrjen e tij në fuqi para zgjedhjeve të mesmandatit në nëntor, të cilat do të përcaktojnë se cila parti do të kontrollojë Kongresin.
Gjyqtarja Indira Talwani u dha të drejtë disa shteteve të kontrolluara nga demokratët, të cilat argumentuan se presidenti republikan po përpiqej në mënyrë të paligjshme të ndërhynte në juridiksionet e tyre.
Trump e nënshkroi urdhrin më 31 mars, pas vitesh thirrjesh për rregulla më të rrepta për votimin në mungesë dhe pretendimeve të pabazuara se humbja e tij në zgjedhjet e vitit 2020 ishte rezultat i mashtrimeve të përhapura.
Sipas Kushtetutës së SHBA-së, shtetet kanë autoritetin për të organizuar zgjedhjet federale.
Urdhri i Trump kërkonte që Departamenti i Sigurisë Kombëtare të hartonte dhe t’u dërgonte shteteve një listë të qytetarëve amerikanë të konfirmuar, të cilët kanë të drejtë vote në zgjedhjet federale. Departamenti do të mbështetej në të dhënat e shtetësisë dhe natyralizimit, si dhe në baza të tjera të dhënash federale.
Urdhri gjithashtu kërkonte që Shërbimi Postar i SHBA-së (USPS) t’u dërgonte fletëvotimet me postë votuesve në çdo shtet që figurojnë në listën e miratuar për votimin në mungesë. Kohët e fundit, USPS ndërmori hapa për zbatimin e direktivës së Trump, duke u kërkuar shteteve të dorëzonin emrat dhe barkodet e votuesve.
Trump i kërkoi gjithashtu Departamentit të Drejtësisë që të prioritizojë hetimet dhe ndjekjet penale ndaj zyrtarëve shtetërorë dhe vendorë që lëshojnë fletëvotime për persona që nuk kanë të drejtë vote.
Grupet për mbrojtjen e të drejtës së votës paditën administratën. Gjithashtu, 23 shtete dhe Distrikti i Kolumbias ngritën padi, duke argumentuar se urdhri i Trump është antikushtetues dhe se presidenti nuk ka autoritet për të organizuar zgjedhjet përmes kompetencave të tij ekzekutive.
Shtetet argumentuan se, nëse urdhri do të mbetej në fuqi, ato do të detyroheshin të ridizenjonin sistemet e tyre të votimit përpara zgjedhjeve të nëntorit, duke shkaktuar konfuzion dhe duke rrezikuar t’u mohonin të drejtën e votës qytetarëve që e gëzojnë ligjërisht atë.
Talwani, e cila u emërua në këtë detyrë nga ish-presidenti demokrat Barack Obama, e mori vendimin pasi një gjyqtar tjetër federal, Carl Nichols, i emëruar nga Trump në Uashington, refuzoi të lëshonte një urdhër të përkohshëm për bllokimin e urdhrit.
Nichols nuk u shpreh mbi themelin e çështjes, por vendosi se kërkesa e shteteve ishte e parakohshme, pasi urdhri ende nuk ishte zbatuar. Shtetet e kanë apeluar atë vendim.
Sondazh
Lexo gjithashtu
