Kryetarja e Kuvendit të Kosovës, Albulena Haxhiu, është detyruar sërish të shtyjë seancën plenare për zgjedhjen e presidentit, për shkak të bojkotit të vazhdueshëm nga deputetët e opozitës.
Seanca, e cila nisi me pritshmëri për të çuar përpara procesin e votimit, u ndërpre vetëm pak minuta pas hapjes. Haxhiu njoftoi se punimet do të rinisin në orën 14:00, duke theksuar se vendimi erdhi në përpjekje për t’i dhënë kohë opozitës që të reflektojë dhe të marrë pjesë në proces.
Ajo u bëri thirrje publike deputetëve opozitarë që të respektojnë detyrimet e tyre kushtetuese, duke theksuar se pjesëmarrja në seancë është një përgjegjësi që buron nga mandati i tyre përfaqësues.
Në argumentimin e saj, Haxhiu iu referua edhe vendimeve të Gjykatës Kushtetuese, opinioneve të Komisionit të Venecias dhe raporteve të institucioneve ndërkombëtare, që nënvizojnë rëndësinë e funksionimit të rregullt të institucioneve demokratike.
"E ftoj opozitën sërish që të vijë në seancën për zgjedhjen e presidentit, pra në këtë seancë të jashtëzakonshme që e kemi nisur dje", tha Haxhiu pasi lexoi disa aktgjykime të Gjykatës Kushtetuese, opinione të Komisionit të Venecias dhe raporte të Asamblesë Parlamentare të Këshillit të Evropës.
Sondazh
Lexo gjithashtu
