Ilir Berisha dhe dy fëmijët e tij të mitur, Naile dhe Kujtimi, janë përcjellë sot për në banesën e fundit. Pasditen e kësaj të premte, familjarë, miq dhe qytetarë të shumtë i dhanë lamtumirën e fundit 35-vjeçarit dhe fëmijëve të tij, të cilët humbën jetën në mënyrë tragjike një ditë më parë në banesën e tyre në lagjen “Mirdita” të Malishevës.
Mes lotëve dhe dhimbjes kortezhi mortor u përcoll drejt banesës së fundit ku dhe babai me dy engjëjt e tij do të prehen.
Humbja e Ilir Berishës dhe dy fëmijëve të tij ka goditur rëndë familjen, të afërmit dhe gjithë komunitetin në Malishevë.
Në shenjë solidariteti dhe respekti, stafi i Shkollës Fillore dhe të Mesme të Ulët “Ibrahim Mazreku” në Malishevë ndezi qirinj për nxënësit Nailen dhe Kujtimin, duke u bashkuar në dhimbje me familjen dhe duke nderuar kujtimin e tyre të paharruar.
Ngjarja e rëndë ndodhi një ditë më parë kur një zjarr përfshiu banesën ku ndodheshin 35-vjeçari Ilir Berisha dhe dy fëmijët e tij, vajza 9-vjeçare Naile dhe djali 12-vjeçar Kujtim. Sipas të dhënave të para, dyshohet se në momentin e shpërthimit të flakëve, ata ishin në gjumë, duke mos pasur mundësi të shpëtonin.
Në atë moment tragjik, në banesë ndodheshin vetëm babai dhe dy fëmijët, ndërsa tre fëmijët e tjerë të familjes nuk ishin prezentë.
Sondazh
Lexo gjithashtu
