Elsa Toska, Sonila Bejtja, Sandër Simoni, Alma Muça, Irena Brahimi, Altina Nasufi, Lazer Çardaku, Genti Xholi dhe Ramiz Lala janë 9 emrat që janë zgjedhur deri tani si anëtarët e rinj të Këshillit të Emërimeve në Drejtësi për vitin 2024. Kryetar i KED është zgjedhur Sokol Ngresi, gjyqtar nga Gjykata e Lartë. Hedhja e shortit u ndoq nga Avokati i Popullit, në cilësinë e monitoruesit. Gjatë hedhjes së shortit, ishin të ftuar përfaqësues nga Kuvendi i Shqipërisë, nga misionet që mbulojnë çështjet e drejësisë; OPDAT-i dhe Delegacioni Europian në Tiranë. Gjithashtu, ishin të pranishëm edhe përfaqësues të Gjykatës Kushtetuese, Këshillit të Lartë Gjyqësor dhe Këshillit të Lartë të Prokurorisë.

Emrat e zgjedhur dhe ato zëvendësues deri tani

Gjykata Kushtetuese: Anëtarë Elsa Toska dhe Sonila Bejtja, zëvendësuese Marjana Semini Gjykata e Lartë: Anëtar Sandër Simoni, Albana Boksi zëvendësuese Prokuroria e Përgjithshme: Anëtare Alma Muça, zëvendësues Arqile Koça Gjykatat e Apelit: Anëtarë Irena Brahimi e Altina Nasufi, zëvendësuese, Ilirjana Olldashi Prokuroritë e Apelit: Anëtarë Lazer Çardaku e Genti Xholi, zëvendësuese, Irma Balli Gjykatat Administrative: Anëtar Ramiz Lala, zëvendësues, Besart Kaçkini Këshilli i Emërimeve në Drejtësi është organ i ri kushtetues, kolegjial, i cili është krijuar me hyrjen në fuqi të ndryshimeve në Kushtetutën e Republikës së Shqipërisë, të ndodhura me miratimin në vitin 2016 të paketës legjislative të reformës në drejtësi. Këshilli i Emërimeve në Drejtësi përbëhet nga 9 anëtarë të përzgjedhur me short, nga radhët e gjyqtarëve dhe prokurorëve, ndaj të cilëve nuk është dhënë masë disiplinore. Anëtarët e zgjedhur të Këshillit të Emërimeve në Drejtësi e ushtrojnë detyrën më kohë të pjesshme, pa u shkëputur nga funksionet e tyre të zakonshme, për një mandat njëvjeçar, që fillon në datën një janar të çdo viti kalendarik.

Këshilli i Emërimeve në Drejtësi mblidhet sa herë është e nevojshme, për të kryer verifikimin e kushteve ligjore dhe për vlerësimin e kritereve profesionale e morale të kandidatëve për Inspektor të Lartë të Drejtësisë, si dhe të kandidatëve për anëtarë të Gjykatës Kushtetuese.