Silvi Bardhi, zëdhënësja e fushatës së kandidatit të PD për Bashkinë e Tiranës, Belind Këlliçi, ka denoncuar kryebashkiakun Erjon Veliaj se “shtron me asfalt elektoral me kompani të sekuestruar, pronari i së cikës është dënuar për trafik droge dhe grup i strukturuar kriminal.”
Përmes një postimi në Facebook, ajo thotë se Veliaj ia ka besuar punët e Bashkisë një kompanie, “Alesio 2014”, e cila sipas saj është vendosur nën sekuestro nga Gjykata e Posaçme Kundër Korrupsionit dhe Krimit të Organizuar. Ajo shkruan se pronari i kësaj kompanie rezulton të jetë Anton Gjinaj, i njohur si Pashuk Gjini, i dënuar për trafik droge në Spanjë.
Postimi i plotë i Silvi Bardhit:
Erjon Veliaj shtron asfalt elektoral me kompani të sekuestruar, pronari i së cikës është dënuar për trafik droge dhe grup i strukturuar kriminal.
Erjon Veliaj ia beson punët e bashkisë një kompanie të vendosur nën sekuestro nga Gjykata e Posaçme Kundër Korrupsionit dhe Krimit të Organizuar.
“Alesio 2014” është kompani e Anton Gjinaj i njohur si Pashuk Gjini, i dënuar për trafik droge në Spanjë. Ai është dënuar nga Gjykata Provinciale të Alicantes në vitin 2010, me 8 vjet e 9 muaj burgim për veprën penale të trafikimit të lëndëve narkotike në kuadër të grupit të strukturuar kriminal.