Një grup deputetësh të Partisë Socialiste i kanë dërguar një kërkesë kryetares së Kuvendit, Lindita Nikolla për përjashtimin me 10 ditë të pesë deputetëve demokratë, për shkak të bllokimit të foltores në seancën e djeshme plenare.
Bëhet fjalë për deputetët: Sali Berisha, Flamur Noka, Belind Këlliçi, Edmond Spaho dhe Edi Paloka. Dokumenti është firmosur nga shtatë deputetë socialistë.
Në kërkesën e firmosur nga deputetët Ismet Beqiraj, Petro Koçi, Denis Deliu, Arben Pëllumbi, Ermonela Valikaj (Felaj), Mimi Kodheli dhe Gerta Duraku, thuhet se deputetët e PD u sollën në mënyrë të pahijshme dhe jo etike, duke penguar zhvillimin e rregullt të seancës plenare dhe duke shkaktuar kaos në kuvend.
