Kreu i LSDM-së, Zoran Zaev ka njoftuar nga Sarajeva e Bosnje-Hercegovinës, aty ku po qëndron për një vizitë zyrtare, se ka arritur të mbledhë firmat për krjimin e qeverisë së re të Maqedonisë.
Zaev nuk ka dhënë detaje për partinë që do i bashkohet në koalicion, por deklarata e tij bëhet pas bisedimeve të zhvilluara me BDI-në e Ali Ahmetit. Kreu i LSDM-së theksoi se qeveria e re do të formohet brenda 15 ditësh dhe tashmë mbetet vetëm ndarja e ministrive.
“Janë siguruar firmat për marrjen e mandatit për formimin e qeverisë së re. Ka mbetur edhe një pjesë e vogël e bisedimeve për qeverinë e re, ndërkohë që çështjet thelbësore janë harmonizuar. Për 10-15 ditë Maqedonia do të ketë qeveri të re të udhëhequr nga social-demokratët. Ka mbetur vetëm ndarja e ministrive”, deklaroi Zoran Zaev.
Nuk dihet nëse partitë e tjera shqiptare do t’i bashkohen qeverisë së mundshme LSDM-BDI, megjithatë kundërshtitë janë të mëdha.