Ambasadorja e SHBA në Tiranë, Yuri Kim ka mbërritur pak çaste më parë në ambientet e Këshillit të Lartë të Prokurorisë, ku prej orës 10:00 të mëngjesit të sotëm ka nisur procesi për zgjedhjen e kreut të ri të SPAK.
Kim ka hyrë në ambientet e brendshme të KLP-së gjatë kohës që po fliste kandidati i fundit për kreun e SPAK, Ervin Kondili, duke shkaktuar edhe ndërprerjen për pak sekonda të seancës së pyetjeve. Kjo pasi ambientet e vogla të KLP-së kanë bërë që kameramanët e shumtë të devijojnë në sallën kryesore.
Më herët në KLP prezantua kandidaturat e tyre prokurorët Adnan Xholi dhe Altin Dumani. Në përfundim edhe të prezantimit nga Kondili pritet që 10 anëtarët e KLP-së të votojnë për kreun e ri të SPAK, me një mandat 3 vjeçar.
Kujtojmë se më herët, ambasadorja Kim ka bërë publiksht thirrje që të mos ketë influenca dhe ndërhyrje te anëtarët e KLP-së për zgjedhjen e kreut të SPAK.
Deklaratat e Kim kanë shkaktuar aludime në media se SHBA ka të preferuarin e saj, dhe qeveria shqiptare favorizon dikë tjetër.
Ambasadorja e SHBA, Yuri Kim mbërrin në ambientet e KLP, ku pritet zgjedhja e kreut të ri të SPAK