Presidenti serb Aleksandër Vuçiç thotë se autoritetet serbe kanë emrin e vrasësit të Oliver Ivanoviç, politikanit nga Kosova, i cili u ekzekutua në Mitrovicën veriore.
Vuçiç nuk ngurroi të përmendë disa emra gjatë fjalimit, dhe akuzoi Shqipërinë se po pengon hetimet duke mos lëshuar informacione lidhur me aktivitetin e dy personave të dyshuar.
Aleksandër Vuçiç: Pyes përse nuk na i japin videot nga aeroporti i Tiranës, Rinasi. Përse nuk mund të gjejmë dëshmi se çfarë ka bërë Florim Ejupi, i cili është nën vëzhgim në Gjermani dhe çfarë ka bërë ai në aeroportin e Tiranës, prej nga ka udhëtuar drejt Gjermanisë. Çfarë ka bërë Nexhmedin Zekaj, i cili ka ndërruar emrin e tij në Lirim Zekaj më pas? Këto janë të gjitha pyetje për të cilat ne nuk mund të marrim përgjigje.
Presidenti serb i ka bërë këto komente pas takimit me kongresimenin amerikan Eliot Engel. Ai ka theksuar se një pjesë e këtyre dëshmive mund të jenë edhe në aeroportin e Tiranës.
Aleksandër Vuçiç, president i Serbisë: Është akuzuar gjysma e botës, por ende nuk e dimë kush është ai që ka vrarë Olliver Ivanoviç, përse dhe për çfarë motivi. Përse nuk na thonë?
Vuçiç ka thënë se ka shumë dëshmi kontradiktore që nuk kanë mundur të verifikohen në mungesë bashkëpunimi.