Është vrarë me armë zjarri në lagjen Kiras të Shkodrës, Ismet Çekorja, babai i Barjam Çekorjas, një prej autorëve të dyshuar të një atentatit 8 ditë më parë.
58-vjeçari Çekorja mbeti i plagosur pasi u qëllua me armë zjarri sot rreth orës 15:00 në afërsi të shkollës veterinare, por nuk ka mundur t’i mbijetojë plagëve dhe ka ndërruar jetë në spital.
Viktima është babai i Bajram Çekorjas, i cili në mbrëmjen e 25 gushtit së bashku me Tornato Fushën qëlluan me breshëri plumbash drejt Alban Bruçit në një tentativë për ta ekzekutuar, por ky i fundit arriti të shpëtojë i palënduar.
Dyshohet se motiv i atentatit ishte një sherr i autorëve të dyshuar me Bruçin rreth dy vite më parë.
Pas ngjarjes, Ismet Çekorja deklaroi në intervistë për mediat se djali i tij ishte i pafajshëm dhe nuk kishet asnjë lidhe me atentatin.
Të dy autorët e dyshuar janë shpallur në kërkim nga policia.
Njoftimi i policisë:
Në lagjen “Guerrile”, në Shkodër, në rrethana ende të paqarta është plagosur me armë zjarri shtetasi I. Ç., 57 vjeç, banues në lagjen “Guerrile”, Shkodër, i cili më pas ka ndërruar jetë në Spitalin Rajonal Shkodër.
Grupi hetimor, nën drejtimin e Prokurorisë, vijon punën në vendngjarje, për sqarimin e plotë të rrethanave, dokumentimin ligjor të kësaj ngjarjeje, me qëllim identifikimin dhe kapjen e autorit/ëve.
Shërbimet e Policisë vijojnë kontrollet, me pika kontrolli në zonën përreth, me qëllim kapjen e autorit/ëve.