Gjykata e Vlorës ka dhënë masën e sigurisë “arrest me burg” për Bledar Selmanajn, i cili akuzohet për vrasjen e 25-vjeçarit Xhulian Bullarit.
39-vjeçari nuk e ka pranuar krimin në sallën e gjyqit, ndërsa seanca ndaj tij ka zgjatur më shumë se dy orë.
Kujtojmë se Bullari u gjet i vdekur një javë më parë në aksin Vlorë-Babicë, në një makinë tip 'Fiat Punto, ku sipas ekspertizës rezultoi se ai është qëlluar me tre plumba nga pasagjeri.
Autori i vrasjes, Selmanaj u arrestua dy ditë më parë në zonën e Bllokut në Tiranë në kuadër të operacionit policor “Babica”. 39-vjeçari kishte njohje të mëparshme me viktimën, të cilin e vrau pas prishjes së pazareve të drogës.
Selmanaj ka thënë në Polici se kishte ndërmjetësuar për shitjen e 100 kg drogë te miqtë e Bullarit, por këta të fundit e kishin bërë pagesën me para false.