Zbardhen detaje të reja nga vrasja e pengut Jan Prenga, 49 vjeç.
Mësohet se Dritan Rexhepi i cili është arrestuar dhe mbahet në burg në Ekuador, ka folur me vëllain e Jan Prengës, Ndrek Prengën i cili ndodhet në një burg në Britani.
Rexhepi i ka premtuar familjese se Prengës se do ia lironte djalin, nëse i kthenin drogën. Ata i kthyen 106 kg drogë (nga sasia totale prej 283 kilogramës), dhe 700 mijë euro njerëzve të Rexhepit por e gjitha rezultoi e kotë.
“E di si janë gjërat por unë ju jap besën. Astriti dhe shoku i tij Shullani, të kthejnë drogën, dhe pengu do të lirohet”, i ka thënë Rexhepi në telefon Ndrek Prengës, vëllait të Janit.
Pasi mori vesh se pengu Jan Prenga kishte vdekur si pasojë e dhunës barbare të pengmarrësve Hajri, Rexhepi foli sërish me Ndrek Prengën dhe i tha se i kishin prerë në besë.
“Ata më kanë lëvizur nga fjala. Por unë të dhashë besën dhe tani do të jap emrat e atyre që e kanë marrë peng vëllain tënd”, ka vijuar më tej ai në telefon duke nxjerrë zbuluar vëllezërit Hajri.
Gjykata dy ditë më parë dha masën arrest me burg për 5 autorët e vrasjes makabre të Jan Prengës në garazhin e resortit luksoz 'Golden' në Durrës.
Masa 'arrest me burg' është dhënë për 5 të arrestuarit të cilët janë Bajram Hajri, Elton Hajri, Leonard Hajri (të tre vëllezër), Olsi Turja dhe Festim Bezhdili, të cilët janë pjesë e bandës që ka kryer ekzekutimin e 49 vjeçarit Prenga.
Këta persona akuzohen për “Rrëmbim ose mbajtje peng e personit”, “Fshehje ose asgjësim i kufomës”, “Veprime që pengojnë zbardhjen e të vërtetës”, “Përkrahje e autorit të krimit”, të kryera në bashkëpunim dhe “ “Armëmbajtje pa leje”.