Kryeparlamentarja Vjosa Osmani zyrtarisht nuk është më nënkryetare e LDK-së dhe as anëtare e Kryesisë së kësaj partie. Këshilli i Përgjithshëm i LDK-së, sot me propozim të kryetarit të partisë Isa Mustafa ka marrë vendim për shkarkimin e Osmanit nga pozitat drejtuese në parti.
Arsyetimi i një vendimi të tillë ka të bëj me sjelljet e Vjosa Osmanit ndaj proceseve të fundit politike, përfshirë mocionin ndaj qeverisë Kurti si dhe formimin e qeverisë Hoti.
Ndonëse LDK nuk ka lëshuar ende komunikatë për media në lidhje me rezultatet e votimit, shkarkimin e Osmanit e ka konfirmuar me anë të një postimi në Facebook deputeti i kësaj partie Haxhi Avdyli, i cili e quan vendimin skandaloz.
“Vendimi i skandaloz për kinse shkarkimin permes Email të Vjosa Osmanit nga organet drejtuese të LDK-së, i inicuar nga njerzit pa legjitimitet qytetar, paraqet vetem një manipulim interneti e asgje më shumë. Votimi i përmes email është një vendim mashtrues dhe frigacak si gjithmonë i disa njerzëve që skanë guxim qytetar të maten e thirren si pronarë të LDK-së . Këta se kanë problem edhe ti manipulojnë rezultatet. Egziston mundesia që rezultatet i ketij sondazhi Online mund te jenë manipuluar prandaj ska vlerë as juridike as obligativ për askënd. Ne dhe secili aktivistë i LDK-së do e konsiderojnë këtë vetëm si nje sondazh pavlerë derisa ky vendim të mos mirret konform rregullave demokratike”, ka shkruar ai.