Një tjetër shqiptar është ekzekutuar në Ekuador ku shkak kryesor dyshohet se është prishja e pazarit të kokainës.
Ngjarja ka ndodhur brenda një lokali në veri të Guayaquil mbrëmjen e djeshme ku dy persona të armatosur kanë gjuajtur për vdekje me breshëri plumbash 34-vjeçarin shqiptar, Ergys Dashi.
Dashi kishte disa kohë që jetonte përkohësisht në Guajakil të Ekuadorit, ndërsa dyshohet se aktiviteti i tij në këtë shtet, ka qenë trafiku i lëndëve narkotike.
Burime pr mediat bëjnë me dije se 34-vjeçari rezulton të jetë pjesë e një grupi kriminal në Tiranë dhe Durrës, ku drejtuesit e këtij grupi kohët e fundit janë zhvendosur në Dubai dhe prej këtij monitojnë trafikun e kokainës nga Ekuadori në vendet e Evropës si dhe në Shqipëri.
Dashi, ishte njeriu i besuar i E.D dhe P.D, që të dy persona të shpallur në kërkim nga drejtësia Shqiptare dhe ajo italiane.
Kujtojmë se ngjarja e rëndë ndodhi mbrëmjen e djeshme ku dy persona shkuan në restorantin ku Dashi po darkonte dhe nga një buqetë me lule nxorën armën me të cilën qëlluan me 20 plumba shqiptarin.
Në videon e publikuar nga mediat vendase shihet qartë trupi i 34-vjeçarit i mbuluar në gjak.