6 shtetas kanë rënë në prangat e Policisë në Shkodër dhe 2 të tjerë janë shpallur në kërkim, pas një operacioni për goditjen e paligjshmërisë në fushën e kultivimit të narkotiokëve. Siç shihet nga pamjet që shpërndan vetë Policia, të arrestuarit janë kapur në gjumë në parcelat e hashashit.
Bazuar në informacionet e marra në rrugë operative është organizuar dhe finalizuar operacioni “Gimaj”. Si rezultat i këtij operacioni u arrestuan në flagrancë shtetasit:
- Gjokë Foleta, 56 vjeç, Pal Alia, 23 vjeç, Besnik Rripa, 22 vjeç, D. Q., 17 vjeç, M.Kroni, 22 vjeçe dhe E. Gjelaj, 24 vjeçe. Gjithashtu janë shpallur në kërkim shtetasit E. Gj. dhe Rr. Rr.
Këta shtetas, në bashkëpunim me njëri-tjetrin, kishin kultivuar bimë narkotike në një zonë malore të pyllëzuar të fshati Gimaj, Shkodër. Gjatë kontrollit është gjetur një sasi lënde narkotike cannabis sativa dhe një armë zjarri automatike me 2 krehër me fishekë.
Në cilësinë e provës materiale janë sekuestruar lënda narkotike, arma e zjarrit, krehrat me fishekë dhe 7 aparate celular.
Materialet iu referuan Prokurorisë së Rrethit Gjyqësor Shkodër, për veprat penale ”Prodhimi dhe shitja e narkotikëve”, ”Kultivimi i bimëve narkotike”, “Mbajtja pa leje e armëve dhe municionit”dhe ”Pastrim i produkteve të veprës penale”.