“Studentët shqiptarë në Londër, inteligjentë e të palodhur, më bënë që të ndihem shumë krenar”. Ky është statusi që ka hedhur në facebook, ministri i Mirëqenies Sociale Erjon Veliaj, ndërsa e shoqëron me një foto mes studentëve. Që prej dy ditëve ministri Veliaj vazhdon vizitën e tij në Londër.
Por menjëherë pas kësaj fotoje, i menjëhershëm ka qenë reagimi i studentëve të tjere që jetojnë e punojnë në Shqipëri. Kanë kërkuar sqarime nga ministri se pse ata që studiojnë në vend nuk vlerësohen njëlloj e pas përfundimit të studimeve punojnë nëpër call center. Ledjona Xhardo i shkruan: Nuk është se ne që jemi në Shqipëri jemi më pak inteligjent apo më pak të palodhur. Por sistemi arsimor në Shqipëri nuk t’i ofron mundësitë e duhura. S’e kuptoj pse ju jepet më shumë përparësi këtyre që studiojnë jashtë ndërsa ne këtu mbarojmë ato pesë vite, paguajmë dhe aq sa do shteti dhe në fund përfundojmë call center”.