Trupi i pajetë i major Klodian Tanushi pritet të mbërrijë në atdhe pas dy ditësh.
Ministria e Mbrojtjes bën me dije se trupi i Tanushit do të sillet në Shqipëri me avionë ushtarakë mesditën e së mërkurës.
Ditën e sotme në bazën Abazi u zhvillua një ceremoni nderimi për majorin, ndërsa mësohet se ditën e enjte në Shqipëri do të mbahet ceremonia shtetërore.
Familja e Major Klodian Tanushit ka hapur dyert e mortit dy ditë më pare.
Tanushi mbeti i plagosur nga shpërthimi gjatë demontimit të një mine së bashku me rreshterin Julian Kapaj, shpërthim në të cilin edhe nëntetarja Zarife Hasanaj humbi jetën.
Major Klodian Nikolla Tanushi kishte lindur në Dibër më 31.10.1980, dhe ishte fëmija i parë i familjes Tanushi. Ai ishte i martuar dhe prind i tre fëmijëve (dy djem dhe një vajzë) përkatësisht 14 vjeç, 11 vjeç dhe 1 vjeç e gjysmë.