Është ironi therrëse, por turistët në plazhet e një prej qyteteve më të frekuentuara gjatë verës, në Sarandë, ndihen më të qetë pas tragjedisë në ujërat e Ksamilit ku mbeti e vrarë një 15-vjeçare nga Rusia.
Shkak janë bërë masat ekstreme të marra nga autoritetet, menjëherë pas ngjarjes së rëndë katër ditë më parë.
Në brigjet e Jugut, jo vetëm janë sekuestruar dhjetra mjete ujore pa dokumentacionin përkatës, por sot zhurma e motorëve të ujit dhe skafeve nuk dëgjohet më. Në plazhet e Sarandës ka rënë qetësia ndërsa në qytet kanë mbërritur zyrtarë të lartë nga Tirana.
Kjo ngjarje e rëndë dhe masat që e pasuan tregojnë edhe një herë sesa të papërgatitur janë autoritetet për t’i paraprirë aksidenteve dhe parandaluar tragjeditë.
E teksa rrugët vijojnë të përgjaken dhe në plazhe nuk ka asnjë roje, nuk është çudi që qeveria të nxherrë ndonjë urdhër që ndalon notimin 1 metër larg bregut të detit.