Teatri “Migjeni” në Shkodër ka reaguar pas vdekjes së Mjeshtrit të Madh Gëzim Kruja ku përmes një postimi në rrjetin social facebook shprehin ngushëllime për familjen dhe respekt për kontributin e tij ndër vite.
Më tej në postimin e teatrit shkruhet se Gëzim Kruja do të jetë i përhershëm në skenën e shtëpisë së tij të dytë.
“Lamtumirë Mjeshtër! Përulje dhe respekt për kontributin tuaj! Mjeshtri Gëzim Kruja do të jetë i përhershëm në skenën e shtëpisë së tij të dytë. Ngushëllime familjes Kruja nga kolegët dhe gjithë kolektivi i teatrit Migjeni”, shkruhet në njoftim.
Gëzim Kruja ka ndërruar jetë në moshën 80 vjeçare. Ai ka një jetë në skenën e humorit dhe ka spikatur me rolet e tij. Ka shkruar 15 komedi, 10 recitate, 2 libra me monologë gazmor.
Ka interpretuar mbi një mijë role në skeçe të ndryshme dhe ka 52 vite që ushtron profesionin e humoristit. Në vitin 2004 ka marrë titullin “Krenaria e Qytetit”. Në vitin 2005 merr titullin “Naim Frashëri i Artë” dhe në vitin 2010 titullin “Mjeshtër i Madh”.