Kreu i Partisë Demokratike Lulzim Basha thotë se vendimi i Ministrisë së Brendshme për të dislokuar forcat e armatosura në Aeroportin “Nënë Tereza” pas grabitjes së bujshme është antikushtetues.
Basha ka shpërndarë në rrjetet sociale edhe Nenin 173 të Kushtetutës ku thuhet se këtë vendim e merr Kuvendi me kërkesë të Këshillit të Ministrave vetëm në rast të emergjencave apo gjatë gjendjes së jashtëzakonshme.
Postimi i Bashës:
Rënia e shtetit dhe akti i fundit antikushtetues i qeverisë ilegjitime, në gërmat e Kushtetutës së Shqipërisë dhe Ligjit për Forcat e Armatosura:
Kushtetuta e Republikës së Shqipërisë
Neni 173
- Në rast rreziku për rendin kushtetues dhe për sigurinë publike, Kuvendi, me kërkesë të Këshillit të Ministrave, mund të vendosë në një pjesë ose në të gjithë territorin e shtetit gjendjen e jashtëzakonshme, e cila zgjat për aq kohë sa vazhdon rreziku, por jo më shumë se 60 ditë.
- Me vendosjen e gjendjes së jashtëzakonshme ndërhyrja e forcave të armatosura bëhet me vendim të Kuvendit dhe vetëm kur forcat e policisë nuk janë në gjendje të rivendosin rendin.
- Zgjatja e afatit të gjendjes së jashtëzakonshme mund të bëhet vetëm me pëlqim të Kuvendit çdo 30 ditë, për një periudhë jo më shumë se 90 ditë!!
LIGJI I PUSHTETEVE TE DREJTIMIT TE FORCAVE TE ARMATOSURA
Neni 22
Përdorimi i Forcave të Armatosura gjatë gjendjes së jashtëzakonshme
- Gjendja e jashtëzakonshme vendoset me ligj nga Kuvendi, sipas dispozitave të Kushtetutës së Republikës së Shqipërisë.
- Me vendosjen e gjendjes së jashtëzakonshme, Forcat e Armatosura, me vendim të Kuvendit, pas kërkesës së Këshillit të Ministrave, mund të ndërhyjnë për rivendosjen e rendit, vetëm kur forcat e policisë nuk janë në gjendje ta kryejnë këtë detyrë.
- Gjatë gjendjes së jashtëzakonshme Kryeministri është drejtpërdrejt përgjegjës për drejtimin e Forcave të Armatosura, përmes hierarkisë së drejtimit e të komandimit.
- Pas përfundimit të gjendjes së jashtëzakonshme Kryeministri i raporton Kuvendit për përdorimin e Forcave të Armatosura gjatë kësaj periudhe.
- Veprimet, që ndërmerren nga Forcat e Armatosura gjatë gjendjes së jashtëzakonshme, duhet të jenë në përpjesëtim me shkallën e rrezikut dhe duhet të synojnë rivendosjen sa më të shpejtë të funksionimit normal të shtetit.