Dje është bërë “shkrumb e hi” një pallat në Gaza, nga disa raketa të ushtrisë së Izraelit.
Mirëpo një video e Reuters po bën xhiron e rrjetit. Izraelitët para se ta bombardonin pallatin morën në telefon administratorin e tij duke i kërkuar që të evakuuonte banorët.
Siç shihet në pamjet që janë shpërndarë në mediat botërore, Jamal Nasman nuk dukej fare i frikësuar teksa fliste në telefon.
“Edhe sa kohë ju duhet? Dy ose tre orë? Ju thatë dy ose tre orë dhe më pas nuk duhet të ketë njeri aty? Të shkoj t’u them që të mos afrohet njeri? Në rregull, do të pres që të godisni. Të gjithë janë larguar nga godina, edhe ata të godinave përreth po qëndrojnë në rrugë. Nuk ka njeri brenda”, dëgjohet Nasman të thotë në telefon.
Ushtria izraelite akuzon Hamasin se po përdor civilët për t’u mbrojtur, ndërkohë që Izraelitët thonë se po bëjnë çmos që të mos lëndojnë civilë. Nga ana e banorëve në Gaza ka patur akuza se bombardimet bëhen pa paralajmërim.