Dy të rinj janë shpallur në kërkim nga Policia e Gjirokastrës, pasi janë konfliktuar me një person tjetër dhe kanë qëlluar me armë drejt tij.
Mësohet se mbrëmjen e djeshme, në aksin rrugor Gjirokastër-Lunxhëri, pas një konflikti të çastit për motive të dobëta, shtetasi Bilbil Lluka ka qëlluar me armë zjarri pistoletë në drejtim të shtetasit K. B., 35 vjeç, banues në Gjirokastër. Bilbil Lluka në momentin kur ka ndodhur ngjarja ka qenë i shoqëruar nga shtetasi D. Sh, dhe janë larguar menjëherë me automjetin e tyre. Nga e shtëna me armë zjarri nuk ka pasur të lënduar.
Në vendngjarje kanë shkuar shërbimet e Policisë, të cilët kanë bërë të mundur identifikimin dhe shpalljen në kërkim të shtetasve Bilbil Lluka 35 vjeç, banues në fshatin Shtëpëz, Gjirokastër dhe D. Sh., 24 vjeç, banues në Gjirokastër.
Në cilësinë e provës materiale u sekuestrua një gëzhojë. Po punohet për zbardhjen e plotë të ngjarjes dhe për kapjen e dy shtetasve të shpallur në kërkim. Materialet i kaluan Prokurorisë pranë Gjykatës se Shkallës së Parë Gjirokastër, për veprime të mëtejshme.
