Hapësire reklamuese

Aktualitet

Tjetër largim nga RTSH, Bledi Strakosha ndjen keqardhje: I uroj fat mesatar

Shkruar nga Newsbomb
Tjetër largim nga RTSH, Bledi Strakosha ndjen keqardhje: I uroj fat mesatar

Bledi Strakosha është larguar nga Televizioni Publik Shqiptar. Lajmin e ka bërë të ditur vetë gazetari që përmes një postimi në rrjetet sociale tregon shkurtimisht atë që po ndodh aktualisht në RTSH.

Nuk mungojnë emocionet, teksa tregon lidhjen shpirtërore që kishte me këtë televizion. Ironizon duke theksuar se gazetarët profesionsitë nuk janë trajtuar në mënyrën më të mirë të mundshme, por i krahason me hurmën e fqinjit në oborrin tënd.

Me sa duket “fshesës” së drejtorit të përgjithshëm Alfred Peza, nuk i ka shpëtuar as Strakosha që në fund e mbyll duke thënë: “I uroj fat mesatar”.

Postimi i Bledi Strakoshës:

Tetë vitet e fundit në RTSH për mua u mbyllën. Asgjë e re dhe asgjë tronditëse për dikë që prej 32 vitesh punon në media. Me lëvizjet e tregut, me ndryshimin e shijeve të audiencës e ndoshta edhe me tekat e drejtuesve a me të kujt u gjendet pranë në zyrë a gjetkë në çaste të caktuara të ditës e të natës, jemi mësuar dhe nuk kapemi të papërgatitur.

I vetmi emocion (i kuptueshëm kësaj radhe) vjen nga lidhja dhe afërsia shpirtërore imja me këtë institucion ku kam hyrë që fëmijë, ku kam mësuar ABC-në e profesionit, ku jam formuar nga profesionistë të televizionit e të drejtimit të mediave. Që nga fillimi i viteve ‘90-të kur nisa punën në RTSH, kam parë të kalojnë shumë emra të njohur të televizionit, siç kam parë të vijnë e të ikin drejtues dhe emërues drejtuesish: secili me shkallën e vet të përkushtimit, ndershmërisë, aftësisë, zgjuarsisë, qytetërimit. Për vullnete, të cilat nuk është ky rasti t’i analizoj, RTSH ka shumë vite që ndodhet në gjendjen që njihet, por ajo që mund të them është se në këtë institucion ka ekzistuar një lloj pakti i pashprehur ku profesionistët janë trajtuar të paktën si trajton qytetari shtëpinë me qira apo fshatari hurmën e fqinjit kur i bie në oborr. Për sa po ndodh aktualisht në RTSH nuk bëj asnjë koment. E vetmja frazë që mund të shpreh është se i uroj RTSH-së një fat mesatar. Së fundmi, gjej rastin të falënderoj nga zemra të gjithë ju që në këto tetë vite keni zgjedhur të më ndiqni apo edhe ju që në ekranin e RTSH-së e që në programet e mia keni ndalur rastësisht.

Shumë falënderime tërë atyre personaliteteve të jetës shqiptare, të cilët kanë pranuar të jenë të ftuar në emisionet e mia, qoftë edhe kur e kanë bërë për miqësi apo si “qokë” personale.

Bashkë, herët a vonë do të shihemi diku.

Me respekt e mirënjohje për të gjithë ju!

Sondazh

Poll

Lexo gjithashtu

Hapësire reklamuese