Të paktën 13 persona mbetën të plagosur gjatë të shtënave me armë në orët e vona të mbrëmjes së djeshme në qendër të Austin, në Teksas.
Dy prej të plagosurve ndodhen në gjendje kritike në spital. Fatmirësisht nuk u raportua për asnjë viktimë nga të shtënat me armë, tha shefi i policisë së Austin, Joseph Chacon.
Të shtënat me armë ndodhën pranë një zonë të mbushur me bare e restorante. Autoritetet thanë se shkaku i të shtënave ishte i paqartë, duke shtuar se oficerërt e policisë transportuan disa prej të plagosurve në spital.
“Oficerët tanë u përgjigjën shumë shpejt. Ata ishin në gjendje të fillonin menjëherë masat e shpëtimit të jetës për shumë nga këta pacientë”, tha shefi i policisë së Austin, Joseph Chacon.
Policia e Teksas-it ende nuk ka një person të dyshuar si autor i ngjarjes, ndërsa po hetojnë kamerat e sigurisë që ndodheshin në zonë.